Буйдан бол үнэтэй тавилгуудын нэг билээ.  

Буйдангаа зөв арчлах нь  урт хугацаанд чанарыг нь хадгалахад тус болдог. Тиймээс бага багаар ойр ойрхон цэвэрлэх нь удаж байгаад их цэвэрлэгээ хийхээс илүү үр дүнтэй. 7 хоногт нэг удаа чийгтэй цэвэрлэгээ хийх нь буйданд тоос, шороо, харшил үүсгэгч зэргийг шингэж орохоос сэргийлдэг.  

Даавуу бол суналттай бат бөх материал юм.  Гэвч амархан халтар болдог учир 3 сар тутамд угааж гүний цэвэрлэгээ хийхийг зөвлөдөг байна.  

Харин савхин материал нь зузаан учир жилд 1-2 удаа гүн цэвэрлэгээ хийх нь тохиромжтой. 

Даавуун буйдан

Эхлээд буйдангийнхаа тоосыг сайтар соруулах хэрэгтэй. Нарийн хошуугаар нь оёдол, нугалаастай хэсгийг ч үлдээлгүй соруулах нь чухал. Учир нь яг л тэр хэсгээр тоос цугларах магадлалтай бөгөөд энэ толбо арилгахад тодорхой хэмжээгээр тусалдаг байна. Харин толбо болон эвгүй үнэрийг арчиж авахын тулд дагалдаж ирсэн цэвэрлэх зааврыг нь харах хэрэгтэй. Хэрвээ байхгүй бол бид танд эхлээд зүгээр усаар арчиж үзэхийг зөвлөж байна. Толбыг зөөлрүүлэхийн тулд уураар жоохон утаж болно. Дараа нь хүйтэн устай бага зэрэг аяга таваг угаагч шингэн холиод порлоноор толбоо арчиж арилгаж болно. Хэрвээ толбо нь хэт удсан арилахгүй байвал арай хүчтэй бодис туршиж үзээрэй.

Алимны цуу эсвэл архи нь ямар ч бодисыг задалж өгдөг тул бага зэрэг дусаагаад арчихад болно. Устай алчуураар арчиж байгаа тул дараа нь архины үнэр нь үлдэнэ гэж айх шаардлагагүй. Хэрвээ ингээд ч арилахгүй бол мэргэжлийн үйлчилгээ авсан нь дээр байдаг. Хэтэрхий их үрэх, нухах нь даавуун материалыг хурдан элэгдүүлж урах магадлалтайг анхаараарай.

Арьсан буйдан

Арьс бол классик сонголт. Мөн цэвэрлэхэд ч амархан. Нойтон алчуур, савантай алчуур, аяга таваг угаагч гээд юугаар ч арчиж болдог нь маш амар. Арьс нь хатаад ирэхээрээ мэдэгдэхүйц барзайгаад өнгөө алдаж эхэлдэг. Тиймээс арьсан буйдангийнхаа насыг уртасгахын тулд тогтмол цэвэрлэгээ хийж чийг өгч байх хэрэгтэй. Харин ямар нэгэн толбо болсон бол хумсны будаг арилгагчаар арилгаж болдог байна.

Хилэн буйдан 

Хилэн материал нь маш онцгой материал. Тиймдээ ч гэртээ гарын доорх материалаар бүрэн гүйцэт цэвэрлэх боломжгүй байдаг. Заавал мэргэжлийн үйлчилгээ авах хэрэгтэй болдог. Тиймээс хилэн буйданг сонгохдоо жоохон хүүхэдтэй, нохой мууртай айлууд татгалзах зүйтэй.