Харшлын ринитийн үед хамрын цацлага хэрэглэх нь шинж тэмдгийг бууруулахад чухал ач холбогдолтой.

Харшлын ринит нь дархлааны тогтолцоо орчны харшил үүсгэгчид болох тоос, ургамлын тоосонцор, амьтны үс, хөгц зэрэгт хэт мэдрэг урвал үзүүлэх үед үүсдэг түгээмэл өвчин юм. Энэ үед хамар битүүрэх, найтаах, нус гоожих, хамар болон нүд загатнах зэрэг шинж тэмдэг илэрч, хүний өдөр тутмын амьдралын чанарт сөргөөр нөлөөлдөг. Харшлын үед хэрэглэдэг хамрын цацлага нь хамрын салстад шууд үйлчилж, хамрын битүүрэл, үрэвсэл, харшлын шинж тэмдгийг бууруулах зорилготой эмчилгээний арга юм. Үйлчилгээ механизм болон найрлагаас хамааран дараах үндсэн ангилалд хуваагдана.

1.    Кортикостероид агуулсан хамрын цацлага

Хамрын салстын үрэвслийг бууруулж, харшлын урвалыг дарангуйлдаг. Харшлын ринитийн эмчилгээнд хамгийн үр дүнтэйд тооцогддог. Жишээ: Fluticasone, Budesonide, Mometasone.

2.    Антигистамин агуулсан хамрын цацлага

 Гистамины рецепторыг хориглож, найтаах, хамар загатнах, нус гоожих шинжийг бууруулна. Жишээ: Azelastine, Olopatadine.

3.    Деконгестант (судас агшаагч) хамрын цацлага

Хамрын салстын судас агшааж хаван бууруулснаар хамрын битүүрлийг хурдан багасгадаг. Гэхдээ 3–5 хоногоос удаан хэрэглэхийг зөвлөдөггүй.

Жишээ: Oxymetazoline, Xylometazoline.

4.    Давсны уусмал (saline) агуулсан хамрын цацлага

Хамрын салстыг чийгшүүлж, тоосонцор болон салстыг цэвэрлэхэд хэрэглэнэ. Харшил болон ханиадны үед дэмжих эмчилгээ болдог.

5.    Антихолинергик хамрын цацлага

Хамраас шингэн усархаг нус ихээр гоожих багасгахад хэрэглэнэ. Жишээ: Ipratropium bromide.

Эдгээр цацлагуудыг зөв сонгон, зөв техникээр хэрэглэх нь эмчилгээний үр дүнг сайжруулдаг. Иймээс харшлын ринитийн үед эмчийн зөвлөсөн хамрын цацлагыг зөв, тогтмол хэрэглэх нь шинж тэмдгийг хянах, амьдралын чанарыг сайжруулахад чухал ач холбогдолтой юм.