Метоклопрамид гэж ямар бэлдмэл вэ? Түүнийг ямар зорилгоор хэрэглэх вэ?

Метоклопрамид нь ходоод-гэдэсний замын дээд хэсгийн хөдөлгөөнийг идэвхижүүлэн, улаан хоолойн агшилтын хугацаа болон давтамжийг ихэсгэнэ.

Ходоодны булчингийн агшилтын далайц болон тонусыг ихэсгэх, 12 хуруу гэдэсний булцуу болон үүдэвчийн хуниасыг сулруулах, 12 хуруу-гэдэс ба нарийн гэдэсний гүрвэлзэх хөдөлгөөнийг сайжруулах үйлдэл тус тус үзүүлнэ. Ингэснээр ходоод, гэдэсний суллах үйл ажиллагааг түргэсгэдэг.

Метоклопрамид нь дофамины рецепторт саатуулах үйлдэл үзүүлнэ. Тайвшруулах үйлдэлтэй.

Эмийн бэлдмэлийн үйлдэл ууж хэрэглэснээс хойш 30-60 минутын хугацаанд илэрнэ.

Хэрэглэх заалт:

  Ходоод улаан хоолойн сөөргөө

Метоклопрамидыг уламжлалт эмчилгээнд (хооллолт, амьдралын хэв маягийг өөрчлөх) үр дүнгүй байгаа насанд хүрэгсдийн ходоод-улаан хоолойн сөөргөөт эмгэгийн богино хугацааны эмчилгээнд (4-12 долоо хоног) хэрэглэнэ.

Эмийн бүтээгдэхүүн нь хооллосны дараа ихэвчлэн өдрийн цагаар илэрдэг сөөргөөтэй холбоотой (Ж: цээж хорсох) шинж тэмдгүүдийг арилгадаг.

  Чихрийн шижингийн үеийн ходоодны үйл ажиллагааны өөрчлөлт

Метоклопрамид нь чихрийн шижинтэй өвчтөний ходоодны үйл ажиллагааны цочмог болон дахилтат өөрчлөлтийн шинж тэмдгийг арилгана.

Метоклопрамид бэлдмэлийг хэрэглэхээс өмнө зайлшгүй танилцах шаардлагатай мэдээлэл

Метоклопрамид эмийн бэлдмэлийг хэдийд хэрэглэж болохгүй вэ?

  Бэлдмэлийг дараах тохиолдолд хэрэглэхийг цээрлэнэ.

• Метоклопрамид болон бэлдмэлийн найрлага дахь бусад бүрэлдэхүүн хэсгүүдэд хэт мэдрэг хүмүүс
• Ходоод-гэдэсний замын цооролт, түгжрэл, цус алдаж буй өвчтөнд
• Феохромоцитома. Учир нь бэлдмэл гипертонийн криз үүсгэж болно.
• Экстрапирамид системийн шинж үүсгэдэг эмийн бэлдмэл хэрэглэж байгаа болон эпилепси өвчтэй өвчтөн (экстрапирамид өөрчлөлт болон таталтын хөдлөлийг ихэсгэх аюултай)
• Нярай хүүхэд

  Дараах тохиолдолд метоклопрамидыг онцгой болгоомжтой хэрэглэнэ.

• Сэтгэл уналын өгүүлэмжтэй өвчтөн (ялангуяа дунд зэргийн болон хүнд явцтай, амиа хорлох хандлагатай). Учир нь метоклопрамидын эмчилгээний үед өвчин дахиж болзошгүй. Ийм учраас эмчилгээ эхлэхийн өмнө эмч эмчилгээний ашигтай нөлөө болон эрсдлийг харьцуулж үнэлэн эмчилгээг шийдэх хэрэгтэй.
• Метоклопрамидын эмчилгээний эхний 24-48 цагийн хугацаанд булчингийн тонус өөрчлөгдөх, мөч өөрийн мэдэлгүй хөдлөх, нүүрний хөдөлгөөн өөрчлөгдөх, хүзүү муруйх зэрэг экстрапирамид системийн шинж тэмдгүүд илэрч болно. Эдгээр шинж тэмдгүүд нь ихэвчлэн метоклопрамидыг өндөр тунгаар хэрэглэсний дараа болон 30-аас доош насны хүмүүс мөн хүүхдэд олонтаа илэрдэг.
• Метоклопрамидын эмчилгээний эхний 6 сард паркинсонизмийн шинж тэмдэг илэрч болно. Эдгээр шинж тэмдгүүд нь эмийн бэлдмэлийг зогсоосноос хойш 2-3 сарын дараа арилдаг.
• Настангууд, ялангуяа эмэгтэй өвчтөнд дискинези илэрч болох бөгөөд энэ нь ихэвчлэн эргэж хэвдээ ордоггүй. Эдгээр шинж нь бэлдмэлийг илүү бага тунгаар хэрэглэж байгаа богино хугацааны эмчилгээний үед ховор тохиолдоно.
• Бөөрний үйл ажиллагааны өөрчлөлттэй өвчтөнд метоклопрамидын эмчилгээний үед цусан дахь калийн хэмжээ багасдаг. (эмийн бэлдмэл нь сийвэнгийн альдостероны агууламжийг нэмэгдүүлэх ба натрийн ялгаралтыг багасгадаг)
  МАО (моноаминоксидаза)-г дарангуйлагч бэлдмэл хэрэглэж буй артерийн даралт ихтэй өвчтөн болгоомжтой хэрэглэх хэрэгтэй. Учир нь метоклопрамид түүний үйлдлийг хүчжүүлдэг.
• Элэгний хатууралтай болон зүрхний зогсонгишилт дутагдалтай өвчтөн болгоомжтой хэрэглэх хэрэгтэй.
• Хөхний булчирхайн хавдрын өгүүлэмжтэй өвчтөн хөхний булчирхайн хавдрын ойролцоогоор 1/3 орчим нь пролактины агууламжаас хамаардаг болох нь судалгаагаар тогтоогдсон. Метоклопрамид нь пролактины түвшинг нэмэгдүүлдэг учраас бэлдмэлийг маш болгоомжтой хэрэглэнэ.
• Метоклопрамид цусны сийвэн дэх альдостероны түвшинг түр зуур нэмэгдүүлж бие махбодид шингэн хуримтлуулж болно.

  Метоклопрамидыг бусад эмийн бэлдмэлүүдтэй хамт хэрэглэх нь.

Доор дурьдсан урьд өмнө нь хэрэглэсэн болон цаашид хэрэглэж болох эмийн бэлдмэлүүдтэй ямар харилцан үйлчлэлтэй болох талаарх мэдээлэлд анхаарлаа хандуулах нь чухал.

Дор дурьдсан эмийн бэлдмэлүүд нь хэд хэдэн янзын худалдааны нэршилтэй байж болно. Энэ хэсэгт бэлдмэлийн нэршлийг оруулдаггүй, харин зөвхөн тэдгээрийн бүлэг буюу үйлчлэх бодисыг заадаг. Ийм учраас хэрэглэх гэж буй эмийн бэлдмэлийн хэрэглэх заавар болон савлагаанд бичигдсэн үйлчлэгч бодисыг нягт нямбай шалгах нь чухал.

• Метоклопрамидын ходоод - гэдэсний замын хөдөлгөөний үйл ажиллагаанд үзүүлэх нөлөөг холинолитик ба опиоидын бэлдмэлүүд багасгана.
• Метоклопрамид нь согтууруулах ундаа, барбитуратууд болон төв мэдрэлийн системийг дарангуйлдаг эмийн бэлдмэлүүдийн үйлдлийг хүчжүүлдэг.
• Метоклопрамид нь ходоодонд шимэгддэг зарим эмийн бэлдмэлүүдийн шимэгдэлтийг багасгадаг. Жишээ нь: дигоксин.
• Мөн нарийн гэдсэнд шимэгддэг эмийн бодисын (парацетамол, тетрациклин, леводопа, циклоспорин, болон согтууруулах) шимэгдэлтийн хурд болон хэмжээг ихэсгэдэг.

  Метоклопрамидыг хоол ундны зүйлтэй хамт хэрэглэх нь:

Бэлдмэлийг хоолноос 30 минутын өмнө хэрэглэнэ.

  Жирэмсэн болон хөхүүл үеийн хэрэглээ:

Жирэмсэн үе:

• Жирэмсэн үед метоклопрамидыг хэрэглэсэн хяналтат судалгаа байдаггүй. Бэлдмэлийг жирэмсний эхний 3 сард хэрэглэж болохгүй. Метоклопрамидыг жирэмсний 2 ба 3 дахь 3 сард зөвхөн зайлшгүй шаардлагатай үед л хэрэглэж болно.

Хөхүүл үеийн хэрэглээ:

• Метоклопрамид нь хөхний сүүгээр ялгардаг тул хөхүүл эхчүүдэд хэрэглэж болохгүй.

  Тээврийн хэрэгсэл жолоодох болон механизмтай ажиллах чадварт бэлдмэлийн үзүүлэх нөлөө:

• Метоклопрамидыг хэрэглэх үед механизмтай ажиллах болон тээврийн хэрэгсэл жолоодож болохгүй талаар мэдээлэл байдаггүй. Гэвч зарим өвчтөнд төв мэдрэлийн тогтолцооний зүгээс сэтгэцийн болон бие махбодын ажиллах чадварыг өөрчилдөг гаж нөлөө (жишээ нь толгой эргэх, нойрмоглох) ажиглагддаг. Ийм гаж нөлөө илэрсэн тохиолдолд тээврийн хэрэгсэл жолоодох болон механизмтай ажиллахаас татгалзана.

  Метоклопрамидын найрлага дахь зарим туслах бодисын талаарх чухал мэдээлэл

• Бэлдмэл нь лактозын моногидрат агуулдаг. Өвчтөн хэрэв зарим төрлийн сахар зохидоггүй гэдгээ мэддэг бол метоклопрамидыг хэрэглэхээс өмнө эмчид хандах нь зүйтэй.

Метоклопрамид бэлдмэлийг хэрэглэх арга

Бэлдмэлийг эмчийн зааврыг чанд баримтлан хэрэглэх нь зүйтэй.

Метоклопрамидын тун нь өвчтөн бүрт өвөрмөц байж болно.

Метоклопрамидыг ихэвчлэн дараах тунгаар хэрэглэнэ.

  Насанд хүрэгсэд:

Ходоод-улаан хоолойн сөөргөө

• Бэлдмэлийг 1 шахмалаар (10мг) хооллох бүрдээ хооллохоос 30 минутын өмнө ба унтахын өмнө ууж хэрэглэнэ. Хоногт 4-с илүүгүй удаа хэрэглэнэ.
• Метоклопрамидыг 12 долоо хоногоос удаан хугацаагаар хэрэглэж болохгүй.
• Хэрэв сөөргөөний шинж тэмдгүүд үе үе юмуу хоногийн тодорхой хугацаанд илэрдэг бол метоклопрамидыг шинж тэмдэг илрэхээс өмнө 2 шахмалаар (20мг) 1 удаа хэрэглэж болно.
• Метоклопрамидын эмчилгээнд маш мэдрэг өвчтөнд (ялангуяа настангууд) бэлдмэлийн нэг удаагийн тунг 5мг хүртэл багасгах шаардлагатай.

Чихрийн шижингийн үеийн ходоодны үйл ажиллагааний өөрчлөлт

• Метоклопрамидыг 1 шахмалаар (10мг) хооллох бүрдээ хооллохоос 30 минутын өмнө болон унтахын өмнө ууж хэрэглэх бөгөөд эмчилгээний илэрч буй үр дүнгээс хамаарч 2-8 долоо хоногийн хугацаанд хэрэглэнэ.
• Метоклопрамидын эмчилгээг өвчний анхны шинж тэмдэг илэрсний дараа шууд эхэлнэ.

Элэг болон бөөрний дутагдлын үед:

• Метоклопрамид үндсэндээ бөөрөөр ялгардаг учир бэлдмэлийг хэрэглэх тун хэмжээ ба давтамж нь бөөрний дутагдлын зэргээс хамаарна.
• Креатинины клиренс нь 40мл/мин байгаа өвчтөнд эхэлж хэрэглэх метоклопрамидын тун нь бөөрний үйл ажиллагаа хэвийн өвчтөнд зөвшөөрөгдсөн тунгийн хагасаас бага байна.
• Элэгний үйл ажиллагааны өөрчлөлттэй өвчтөнд метоклопрамидын тунг зайлшгүй тохируулах шаардлагагүй.

  Хүүхдэд хэрэглэх тун:

Метоклопрамидыг 15-аас доош насны хүүхдэд шахмал хэлбэрээр хэрэглэж болохгүй.

15-19 насны өсвөр насны хүүхэд:

• 59кг-аас дээш жинтэй хүүхдэд метоклорамидыг 1 шахмалаар (10мг) хоногт 3 удаа хэрэглэнэ.
• 30-59кг жинтэй хүүхдэдхагас шахмалаар (5мг) хоногт 3 удаа хэрэглэнэ.

Хэрэв эмийн бэлдмэлийн үйлдэл хэт хүчтэй, эсвэл хэт сул илэрч байгаа юм шиг санагдвал эмчид хандах хэрэгтэй. Өөрөө дур мэдэн эмийн бэлдмэлийн тунг өөрчилж болохгүй.

  Метоклопрамидыг зөвлөсөн тунгаас их хэмжээгээр хэрэглэх үед:

Бэлдмэлийг зөвлөсөн тунгаас их хэмжээгээр хэрэглэсэн тохиолдолд яаралтай эмчид хандаж тохирсон эмчилгээ хийнэ.

Тун хэтэрсний шинж тэмдэг: нойрмоглох, баримжаа алдагдах, экстрапирамид өөрчлөлт.

Диализийн тусламжтайгаар метоклопрамидыг бага хэмжээгээр гадагшлуулж болох ба харин тун хэтэрсэн үед уг ажилбар нь онцын ач холбогдолгүй байна.

Илэрч болох гаж нөлөө

Бусад эмийн бэлдмэлийн нэгэн адилаар метоклопрамидыг хэрэглэх үед гаж нөлөө илрэх боловч энэ нь хүн бүрт тохиолдохгүй.

Мэдрэлийн тогтолцооны зүгээс илрэх өөрчлөлт.

• Олонтаа илрэх - тайван бус болох, нойрмоглох, ядрах сульдах.
• Ховор илрэх - нойргүйдэх, толгой өвдөх болон эргэх, баримжаа алдагдах, амиа хорлох хандлагатай сэтгэл гутрал, харааны өөрчлөлт, цочмог дистони (биеийн янз бүрийн хэсгүүд нугаларч тахийсан ухамсарт бус хөдөлгөөн), дискинези (биеийн бүх хэсгийн болон мөчдийн зохицуулгагүй, ухамсарт бус хөдөлгөөн) паркинсонизмын шинж тэмдэг, акатизи (хөдөлгөөнгүйгээр удаан байх чадваргүй - хөдөлгөөний тайван бус байдал үүсдэг хам шинж).

Бусад:

• Хөхний сүү ялгарах, биений юмгүйдэл, эрчүүдийн хөх томрох, бэлгийн сулрал
• Артерийн даралт буурах ба ихсэх, зүрхний агшилтын давтамж олшрох ба цөөрөх
• Дотор муухайрах, гэдэс хямрах, гол нь суулгалт,
• Шээс задгайрах, олон шээх
• Зарим тохиолдолд: тууралт, чонон хөрвөс, гуурсан хоолой агчих (ялангуяа гуурсан хоолойн багтрааны өгүүлэмжтэй өвчтөн), ховор – хэл ба төвөнх хавагнах

Порфирий

• Цусан дахь метгемоглобины хэмжээ ихсэх (цусанд өөрчлөгдсөн гемоглобин илэрдэг эмгэг - хүчилтөрөгчид зөөх чадваргүй, эдийн хүчилтөрөгчийн дутагдал үүсгэдэг) ялангуяа нярай хүүхдэд илрэх магадлалтай.

Ямар нэгэн гаж нөлөө хүндрэх эсвэл уг эм хэрэглэх зааварт дурьдагдаагүй гаж нөлөө илэрсэн тохиолдолд эмчид эсвэл эмзүйчид хандах хэрэгтэй.

Метоклопрамидын найрлагад юу юу агуулагддаг вэ?

Метоклопрамид Польфарма бэлдмэлийн үйлчлэгч бодис нь 10мг метоклопрамидын гидрохлорид (Metoclopramidi hydrochloridum) юм.

Туслах бодис: лактозын моногидрат, төмсний цардуул, повидон К-30, магнийн стеарат.

Хадгалах нөхцөл:

• Бэлдмэлийг хүүхэд үзэж хүрэхээргүй газар хадгалах хэрэгтэй.
• +25°С-аас дээшгүй хэмд хадгална. Гэрэл ба чийгнээс хамгаална. Савлагаанд заагдсан хүчинтэй хугацаа дууссанаас хойш эмийн бэлдмэлийг хэрэглэж болохгүй. Хүчинтэй хугацаа нь тухайн сарын сүүлийн өдөр хүртэл үргэлжилнэ.
• Эмийн бэлдмэлийг бохирийн ус, ахуйн хог хаягдалд хийж устгаж болохгүй.

Эмийн сангаас олгох нөхцөл:

• Жортой олгоно. Эмчийн зааврын дагуу хэрэглэнэ.

Эмийн хуудасруу энд дарж ороорой.

Худалдааны нэршлийн жагсаалт:

• Пирален
• Метоклопрамид
• Церуглан
• Метолон
• Церукал

Нэртэй холбоотой түлхүүр үгс:

• метоклопрамид тариа
• метоклопрамид эм
• метоклопрамид эмийн заавар
• метоклопрамид хэрэглэх заалт
• метоклопрамид хэрэглэх заавар
• церукал эм
• церукал тариа
• церукал хэрэглэх заалт
• церукал хүүхдийн тун
• церукал эмийн тухай
• церукал уух заавар
• бөөлжилтийн эсрэг эм