Панцеф гэж юу вэ? Панцеф эмийг юунд хэрэглэдэг вэ?

Панцеф нь цефиксим гэдэг эмийн бодис агуулдаг. Энэ нь цефалоспорины бүлгийн антибиотикт хамаарагдана.

Бэлдмэлийг бактериар үүсгэгдсэн дараах халдварын үед хэрэглэнэ.

Үүнд:

• Амьсгалын дээд замын цочмог халдварууд (фаринго-тонзилит-синусит);
• Дунд чихний цочмог үрэвсэл;
• Амьсгалын доод замын халдварууд (гуурсан хоолойн цочмог үрэвсэл, гуурсан хоолойн архаг үрэвслийн сэдрэл, уушгины хатгалгаа);
• Шээс ялгаруулах замын хавсарсан болон дан халдвар, цочмог пиелонефрит хамаарагдана;
• Заг хүйтэн (умайн хүзүү/шээсний сүв).

Панцеф эмийн хэрэглэхийн өмнө юунд анхаарах вэ?

Панцеф эмийг дараах тохиолдолд хэрэглэхгүй.

• Хэрэв та цефиксим болон пенициллины бүлгийн антибиотик, бэлдмэлийн найрлага дахь бусад бодист харшилтай бол.
• Дараах харшлын урвал илэрсэн бол: тууралт гарах, залгих эсвэл амьсгалахад хүндрэлтэй байх, уруул, төвөнх, хэл хавагнах.

Дээрх шинжүүд илэрсэн бол бэлдмэлийг хэрэглэж болохгүй. Хэрэв та өөртөө итгэлгүй бол Панцеф бүрхүүлтэй шахмал эмийг хэрэглэхийн өмнө эмч эсвэл эм зүйчид хандана уу.

  Анхааруулга ба болгоомжлол

Панцеф бэлдмэлийг дараах тохиолдолд болгоомжтой хэрэглэнэ.

• Бүдүүн гэдэсний салст бүрхүүлийн үрэвсэл эмгэгтэй бол
• Харшлын урвал илрэх хандлагатай эсвэл гуурсан хоолойн багтраатай бол;
• Энэ эмийг 10-аас дээш насны хүүхэд хэрэглэнэ.

Хэрэв дээрх тохиолдолын талаар таньд эргэлзээ төрвөл бэлдмэл хэрэглэхийн өмнө эмч эсвэл эм зүйчтэй зөвлөнө үү.

Хэрэв цефалоспорин ба пенициллины бүлгийн бэлдмэлд хэт мэдрэг (арьсан дээрх тууралт, зүрх дэлсэх, амьсгал давхцах), эсвэл ямар нэг эмийн бэлдмэл хэрэглэсний дараа хэт мэдрэгших урвал илэрч байсан бол Панцеф бэлдмэлээр эмчилгээ эхлэхийн өмнө эмчид мэдэгдэнэ үү.)

Панцеф эмийн эмчилгээ удаан хугацаагаар үргэлжлэх бол элэг, бөөр болон цусны шинжилгээ хийлгэхийг эмчлэгч эмч зөвлөж болно.

Цефиксим эмчилгээний үед эсвэл дараа маш ховор тохиолдолд антибиотикийн шалтгаант бүдүүн гэдэсний эмгэг үүсч болзошгүй. Энэ тохиолдол хүнд хэлбэрийн удаан хугацаагаар үргэлжилсэн суулгалт илрэх боловч эмчлэгддэг. Ийм шинж илэрсэн бол эмчид мэдэгдэж зөвлөгөө авна уу.

Хэрэв Панцеф эмчилгээний явцад таньд DRESS хам шинж, Свтивенс-Жонсоны хам шинж, Лайлын хам шинж илэрвэл эмийг хэрэглэхээ даруй зогсоож эмчлэгч эмчтэйгээ холбогдох хэрэгтэй.

Хэрэв та ойрын үед антибиотик, шээс хөөх эм, нифедипин (кальцийн суваг хориглогч-цусны даралт бууруулах эмчилгээнд хэрэглэдэг бэлдмэл), эсвэл цусны бүлэгнэлтийг бууруулах кумарин зэргийг хэрэглэсэн бол Панцеф эмийг хэрэглэхийн өмнө эмчид мэдэгдэнэ үү.

Панцеф эмийг хэрэглэснээр биеийн байдал сайжирч, өвчний шинж тэмдэг арилсан ч эмчийн зааваргүйгээр эмчилгээг зогсоох болон өөрчлөх нь өвчин хүндэрч ужгирах шалтгаан болно.

Панцеф ба бусад эмийн бэлдмэл

Ойрын хугацаанд ямар нэг эмийн бэлдмэл хэрэглэсэн бол эмч эсвэл эм зүйчид мэдэгдэх шаардлагатай.

Үүнд зарим антибиотик ба шээс хөөх эмүүд хамаарагдана. Панцеф эмийг эдгээр эмтай хамт хэрэглэхэд бөөрний үйл ажиллагаанд нөлөөлнө.

Дараах бэлдмэлийг болгоомжтой хамт хэрэглэнэ үү.Үүнд :

Нифедипин (кальцийн суваг хориглогч-цусны даралт бууруулах эмчилгээнд хэрэглэдэг бэлдмэл – нифедипин нь Панцефийн үйлдлийг ихэсгэнэ (нифедипин нь цефиксимийн биохүрэхүйг нэмэгдүүлнэ);

Кумарины бэлдмэл (цус бүлэгнэлтийг багасгахад хэрэглэдэг) – цефиксимтэй хамт хэрэглэхэд үйлдэл нь нэмэгддэг. Эмч цусны бүлэгнэлтийг тодорхойлох шинжилгээ хийлгэхийг санал болгож болно.

Шинжилгээ

Хэрэв ямар нэг шинжилгээ (цус, шээс эсвэл оношлогоо) хийлгэх гэж байгаа тохиолдолд та эмчдээ Панцеф эмийг хэрэглэж байгаа гэдгээ мэдэгдэх шаардлагатай.

Панцеф ба хоол хүнс

Панцеф эмийг хоолноос үл хамааран хэрэглэж болно.

Жирэмсэн, хөхүүл үеийн хэрэглээ

Хэрэв та жирэмсэн, жирэмсэн байж болзошгүй, хөхүүл эсвэл жирэмслэхээр төлөвлөж байгаа бол энэ бэлдмэлийг хэрэглэхийн өмнө эмч, эм зүйчтэй зөвлөнө үү. Энэ бэлдмэлийг жирэмсэн, хөхүүл эмэгтэйчүүд эмчийн зааваргүйгээр хэрэглэж болохгүй. Хэрэв хөхүүл үед бэлдмэл хэрэглэх бол хүүхдийг хөхний сүүгээр хооллохгүй.

Жолоо барих ба техник ашиглах
Панцеф эм нь жолоо барих болон техник ашиглах чадварт нөлөөлөхгүй.

Панцеф эмийг хэрхэн хэрэглэх вэ?

Эмч, эм зүйчийн зөвлөсөн зааврын дагуу бэлдмэлийг хэрэглэнэ. Хэрэв эргэлзэж байвал эмч, эм зүйчээс дахин лавлана уу.

Бэлдмэлийг ууж хэрэглэнэ.

Бэлдмэлийг хоногийн зөв цагт хэрэглэх нь чухал.

Бэлдмэл хэрэглэх хугацааг жоронд заасан байна. Эмчилгээ үргэлжлэх хугацаа ихэвчлэн 7 хоног байдаг боловч хүнд хэлбэрийн халдварын үед 14 хоног хүртэл үргэлжилж болно.

Зөвлөж буй тун:

• Насанд хүрэгчид, өндөр настан, 10-аас дээш насны хүүхэд буюу 50 кг-аас дээш жинтэй хүмүүсд:
• Хоногт нэг удаа 400 мг /1 шахмал/ эсвэл тунг хоёр тэнцүү хувааж 200 мг /1/2 шахмал/ тунгаар 12 цагийн зайтай хэрэглэнэ.

Бөөрний үйл ажиллагааны эмгэгтэй хүмүүс

• Эмчлэгч эмч таны хэрэглэх тунг бууруулж болно.

10 хүртлэх насны хүүхэд

• Панцеф ууж хэрэглэх хөвмөлийг хэрэглэнэ.
• Шахмалыг хоёр тэнцүү тунгаар хувааж болно.

Панцеф эмийг зөвлөсөн тунгаас ихээр хэрэглэсэн бол:

• Хэрэв Панцеф эмийг зөвлөснөөс их тунгаар хэрэглэсэн бол яаралтай эмчид хандана уу..
• Тун хэтэрсэн үед ходоод угааж болно.

Панцеф бэлдмэл хэрэглэхээ мартсан бол:

• Мартсан тунг нөхөх зорилгоор давхар хэрэглэж болохгүй.
• Хэрэв бэлдмэл хэрэглэхээ мартсан буюу дараагийн тунг хэрэглэх хугацаа болоогүй бол санасан даруйд хэрэглэнэ.

Панцеф эмийг хэрэглэхээ зогсоосон бол:

• Хэдийгээр биеийн байдал тань сайжирсан ч эмчийн зааваргүйгээр бэлдмэл хэрэглэхээ зогсоож болохгүй. Учир нь халдвар дахих эсвэл биеийн байдал дордож болзошгүй.
• Хэрэв танд нэмэлт мэдээлэл шаардлагатай эмч, эмзүйчээс аваарай.

Памцеф эмийг хэрэглэж байгаа үед ямар гаж нөлөө илрэх вэ?

Бусад эмийн бэлдмэлтэй адил гаж нөлөө илэрч болзошгүй ч энэ нь хүн бүрд илрэхгүй байж болно.

Дор дурдсан ноцтой гаж нөлөө илэрвэл даруй эмч эсвэл сувилагчид мэдэгдэж эмнэлгийн яаралтай тусламж авна уу.

Ховор илрэх гаж нөлөө (1000/1 -ээс цөөн тохиолдолд илэрнэ):

• Судас-мэдрэлийн хавангаас шалтгаалан нүүр, хэл, мөгөөрсөн хоолой хавагнаж амьсгал богиносох;
• Улайж, хавагнасан тууралт; зовхи, нүүр, уруул, ам, хэл хавагнах; загатнаа; амьсгалах (амьсгал богиносох) ба залгихад хүндрэлтэй болох; ядрах эсвэл толгой эргэх, ухаан балартах, коллапс (анафилаксийн шок).

Ховор илрэх гаж нөлөө (1000/1 -ээс цөөн тохиолдолд илэрнэ):

• Арьсанд мультиформ тууралт гарах (голд нь жижиг харласан, хүрээлсэн бараан өнгөтэй, цэврүүт тууралт); тууралт тархмал хэлбэртэй байх ба арьс гуужих, ялангуяа ам, хамар, нүд, бэлэг эрхтэн орчмоор туурах ба Стивенс – Жонсоны хам шинж гэж нэрлэдэг ба биеийн гадаргуугийн 30%-аас дээш хэсэгт тууралт гарсан хүнд хэлбэрийг нь Лайлын хам шинж гэж нэрлэдэг.

Давтамж тодорхойгүй:

• Бүх бие загатнах, халуурах, тунгалгийн зангилаа томрох ба цусны цагаан эсийн тоо олшрох (эозинофили) - DRESS хам шинж.

Эмийг хэрэглэхэд илэрч болзошгүй бусад гаж нөлөө:

Байнга илрэх гаж нөлөө (10 хүнээс 1-д илэрч болзошгүй):

• Өтгөн шингэрэх, гүйлгэх.

Хаяа илрэх гаж нөлөө (100 хүнээс 1-д илэрч болзошгүй):

• Ходоод өвдөх, биж хам шинж
• Дотор муухайрах, бөөлжих
• Толгой өвдөх
• Арьсанд тууралт гарах
• Сийвэнд элэгний ферментийн хэмжээ түр зуур ихсэх.

Ховор илрэх гаж нөлөө (1,000 хүнээс 1-д илэрч болзошгүй):

• Цусны цагаан эсийн тоо олшрох (эозинофили)
• Толгой эргэх;
• Хоолны дуршил буурах;
• Мочевины хэмжээ түр зуур ихсэх;
• Загатнаа, салст бүрхүүлийн үрэвсэл
• Удаан хугацаагаар болон давтан хэрэглэхэд эмэнд тэсвэртэй бактери мөөгөнцрөөр дахин халдварлах (бэлэг эрхтэний эсвэл үтрээний загатнаа);
• Эмийн шалтгаант халууралт;
• Арьс улайх.

Маш ховор илрэх гаж нөлөө (10,000 хүнээс 1-д илэрч болзошгүй):

• Цусны зарим эмгэгүүд: цагаан эсийн тоо цөөрөх (лейкопени, агранулоцитопени), ялтаст эсийн тоо цөөрөх ( тромбоцитопени), цусны эсүүдийн тоо цөөрөх (панцитопени), цус бүлэгнэлтийн эмгэг, цус багадалт (цус задралын цус багадалт) – эмчилгээ зогссоны дараа эдгээр үзүүлэлт хэвийн хэмжээндээ хүрнэ.
• Түр зуурын хөдөлгөөний хэт идэвхжил (гиперактив)
• Антибиотикийн шалтгаант бүдүүн гэдэсний үрэвсэлт эмгэг (жиш: псевдомембраноз колитын үед усархаг, цустай шингэнээр гүйлгэх)
• Сийвэн дэх креатинины хэмжээ нэмэгдэх, бөөрний үрэвсэл (бөөрний завсарын эдийн үрэвсэл);
• Сийвэнгийн өвчинтэй төст урвал (халууралт, бие тавгүйрхэх, арьсанд тууралт гарах, загатнах, үеэр өвдөх, тунгалгийн зангилаа томрох);
• Элэгний үрэвсэл (гепатит) ба шарлалт.

Хэрэв таньд энэхүү зааварт дурдагдсан болон дурдагдаагүй гаж нөлөө илэрвэл эмч эсвэл эм зүйчид хандаарай.

Хадгалах нөхцөл:

• Бэлдмэлийг хүүхэд хүрэхээргүй газар хадгална.
• Бэлдмэлийн савлагаа дээрх хүчинтэй хугацаа өнгөрсөн бол хэрэглэж болохгүй. Хүчинтэй хугацааг тухайн сарын сүүлийн өдрөөр тооцно.
• Бэлдмэлийг 250С ихгүй хэмд хадгална.
• Бэлдмэлийн савыг ахуйн хогонд хаяж болохгүй. Хэрэглэхгүй үлдсэн эмийг хэрхэн устгах талаар эм зүйчээс лавлана уу. Энэ арга хэмжээ нь хүрээлэн байгаа орчноо хамгаалахад тань тусална.

Панцеф эмэнд юу агуулагддаг вэ?

Үйлчлэгч бодис цефиксим.

• Ууж хэрэглэх бүрхүүлтэй шахмалд 400мг цефиксим агуулагдана. (цефиксим тригидрат хэлбэрээр).
• Туслах бодис: жижиг талст целлюлоз, цардуул, кальцийн устөрөгчийн фосфат, магни стеарат, гипомолоз, макрогол 400, титаны диоксид E 171.

Эмийн сангаас олгох нөхцөл:

• Жортой олгоно. Эмчийн зааврын дагуу хэрэглэнэ.

Эмийн хуудасруу энд дарж ороорой.

Худалдааны нэршлийн жагсаалт:

• Панцеф
• Супракс солютаб
• Ланфикс
• Калмаксим
• Махацеф-200
• Девиксим
• Девиксим ДС
• Цефорал солютаб

Нэртэй холбоотой түлхүүр үгс:

• панцеф эм
• панцеф сироп эм
• панцеф антибиотик
• панцеф хэрэглэх заавар
• цефиксим хэрэглэх заавар