Эмийн худалдааны нэр:

Промез

Олон улсын нэршил:

Омепразол

Эмийн хэлбэр: Капсул

Найрлага:

Үндсэн үйлчлэгч бодис: Омепразол 20мг
Туслах бодис: Манитол, лактоз, гидроксипропилметилцеллюлоз, (2 суурьт усгүй) кальцийн гидрогенфосфат, касторын тос, цардуул.

Капсулын бүрээс:

Желатин, кармозин
Гэдсэнд уусдаг бүрхүүлтэй мөхлөг бүхий 20мг омепразол.

Гадаад байдал:

Цагаан буюу цахиурын цагаан өнгөтэй, гэдсэнд уусдаг бүрхүүлтэй мөхлөг агуулсан, тунгалаг цайвар ягаан өнгөтэй, хатуу желатинан капсул.

Эмийн эмчилгээний бүлэг:

Протоны шахуургад хориг үүсгэгч, шархлааны эсрэг бэлдмэл.

ATC код: A02BC01

Эм судлалын үйлдэл:

Омепрозол ходоодны париеталь эсийн мембраны Н+ К+ АТФ-аза (протоны шахуурга) ферментэд хориг үүсгэснээр ходоодонд давсны хүчил нийлэгжилтийн төгсгөлийн үед нь хориглоно. Ингэснээр цочруулагчаас хамааралгүйгээр ходоодны суурь ба өдөөгдсөн шүүрэл ялгаралт багасна. Омепразолыг дотуур ууж хэрэглэхэд 1 цагийн дараагаар түүний үйлдэл илэрч, 24 цагийн турш үргэлжлэх ба хамгийн их үр нөлөө 2 цагийн дараа илэрнэ. Бэлдмэлийн хэрэглээг зогсооход 3-5 хоногийн дараагаар ходоодны шүүрэл ялгаралт хэвийн болно.

Фармакокинетик:

Омепразол ходоод гэдэсний замаар түргэн шимэгдэнэ. Сийвэн дэх концентраци 0.5-3.5 цагийн дараа дээд хэмжээндээ хүрнэ. Системийн өмнөх хувиралд орсоноор биохүрэхүй 30-40% болно. Давтан хэрэглэхэд биохүрэхүй нэмэгдэнэ. Тархалтын эзэлхүүн 0.3л/кг. Креатининий клиренс 500-600мл/мин. Сийвэнгийн уурагтай холбогдолт 90%. Хагас ялгаралтын хугацаа 0.5-1 цаг. Омепразол нь цитохром Р450-ын оролцоотойгоор элгэнд бараг бүрэн хувирна. Хувирсан метаболитууд нь фармакологийн идэвх үзүүлэхгүй. Бөөрөөр 70-80% нь метаболит хэлбэрээр, 20-30% нь цөсөөр ялгарна. Элэгний үйл ажиллагааны алдагдалтай өвчтөнд биохүрэхүй 100% хүртэл ихсэх ба хагас ялгаралтын хугацаа 3 цаг, креатининий клиренс 70мл/мин хүртэл буурна. Бөөрний архаг дутагдлын үед омепразолын шимэгдэлт креатининий клиренс бууралттай пропорционал хамааралтай буурна. Өндөр настанд омепразолын шимэгдэлт буурч, биохүрэхүй нэмэгдэнэ.

Хэрэглэх заалт:

Ходоод, 12 хуруу гэдэсний шархлаа түүний өвдөлт (сэдрэлээс урьдчилан сэргийлэх);
Улаан хоолойн сөргөөт үрэвсэл (рефлюкс-эзофагит);
Стероид бус үрэвслийн эсрэг эм хэрэглэснээс болон стрессээс үүдэлтэй ходоод, дээд гэдэсний шархлаа;
Хеликобактеритай холбоотой ходоод, дээд гэдэсний шархлаа (цогц эмчилгээнд хэрэглэнэ);
Золлингер-Эллисоны хам шинж;
Аденоматоз, системийн мастоцитоз;

Хориглох заалт:

Бэлдмэлд хэт мэдрэг өвчтөнд хэрэглэхийг хориглоно.

Хэрэглэх арга, тун хэмжээ:

Капсулыг ихэвчлэн өглөө бага зэргийн усаар даруулж, зажлахгүй бүхлээр нь залгина. Капсулыг задалж болохгүй.
Ходоод, дээд гэдэсний шархлаа түүний өвдөлт, сэдрэлийн үед хоногт 1 капсул (20мг)-аар 2-4 долоо хоногийн турш ууна (шаардлагатай тохиолдолд хоногт 2 капсулаар хэрэглэнэ).
Ходоодны шархлаа сэдэрсэн болон улаан хоолойн улайлт шархлааны үед хоногт 1-2 капсулаар 4-8 долоо хоногийн турш ууна.
Стероид бус үрэвслийн эсрэг эм хэрэглэсэнээс үүдэлтэй ходоод, дээд гэдэсний улайлт, шархлааны үед 1 капсулаар 4-8 долоо хоногийн турш ууна.
Хеликобактерийн эсрэг эмчилгээнд 1 капсулаар хоногт 2 удаа 7 хоногийн турш антибиотик эмүүдийн хамт хэрэглэнэ.
Ходоод, дээд гэдэсний шархлааны сэдрэлийн эсрэг эмчилгээнд хоногт 1 капсулыг хэрэглэнэ.
Улаан хоолойн сөргөөт үрэвсэл (рефлюкс-эзофагит)-ийн сэдрэлийн эсрэг эмчилгээнд хоногт 1 капсулаар 6 сар хүртэл хугацаагаар хэрэглэнэ.
Золлингер-Эллисоны хам шинж, аденоматоз, системийн мастоцитозийн үед эмийн тунг ходоодны шүүрэл ялгаралтын хэмжээнээс хамааруулан тогтоох ба эмчилгээг ихэвчлэн хоногт 60мг тунгаар эхэлнэ. Шаардлагатай тохиолдолд тунг ихэсгэж 80-120мг болгож, уух тунг 2 хувааж хэрэглэнэ.

Тусгай анхааруулга:

Омепразолыг хүүхдийн практикт болон жирэмсэн, хөхүүл үед хэрэглэхгүй. Хөхүүл үед зайлшгүй хэрэглэх тохиолдол гарвал хүүхдийг хөхөөр хооллохоо зогсооно. Промез эмчилгээ эхлэхийн өмнө ходоод, гэдэсний замд хорт хавдрын процесс явагдаж байгаа эсэхийг үзүүлэх хэрэгтэй. Учир нь Промез шинж тэмдгийг халхалж, оношилоход саад учруулж болзошгүй. Бөөрний хүнд дутагдалтай хүнд Промезын хоногийн тунг 20мг-аас хэтрүүлж болохгүй. Хоол идэх үедээ хэрэглэхэд эмчилгээний идэвхт нөлөөлөхгүй. Мөн машин механизмтай харьцах чадварт нөлөөлөхгүй.

Гаж нөлөө:

Хоол боловсруулах замын зүгээс:

Суулгах эсвэл өтгөн хатах, хэвлийгээр өвдөх, ам хатах, амт мэдрэх чанар өөрчлөгдөх, амны салстын үрэвсэл, түр хугацаагаар цусанд элэгний ферментүүдийн хэмжээ ихсэх;

Мэдрэлийн системийн зүгээс:

Толгой өвдөх, эргэх, цочромтгой болох, нойрмоглох, нойргүйдэх, үе мөч бадайрах (парестези), сэтгэл гутрал, хий үзэгдэр илрэх;

Яс-булчин, тулгуур эрхтэний зүгээс:

Булчин сулрах, булчин, үе мөч өвдөх;

Цусны системийн зүгээс:

Лейкопени, тромбоцитопени, агранулоцитоз, панцитопени, цус багадалт;

Арьсны зүгээс:

Олон хэлбэрт улайлт, гэрэлд мэдрэгших, үс халцрах;

Харшлын урвал:

Чонон хөрвөс; загатнаа, судас-мэдрэлийн хаван, бронхоспазм, интерстициаль нефрит, халуурах;

Бусад:

Хараа болон амт мэдрэх чанар өөрчлөгдөх, захын хаван, гинекомасти, удаан хугацааны эмчлгээний үед булчирхат эдийн хоргүй уйланхай;

Бусад эмийн харилцан нөлөөлөл:

Омепразол диазепам, фенитоин, варфарины элеминацийг удаашруулж, пропранолол, кофейн, парацетамолын биотрансформацийг түргэсгэнэ. Омепразол нь ходоодны хүчлийн хэмжээг бууруулдагтай холбоотойгоор ходоодны рН бүхий орчинд биохүрэхүй нь явагддаг эмийн шимэгдэлтийг бууруулна. (ампициллины эфир, төмрийн давс, итраконазол, кетоконазол)

Тун хэтрэлт:

Омепразолын тун хэтэрснээс хараа өөрчлөгдөх, нойрмоглох, мэдрэг болох, толгой өвдөх, ам хатах, бөөлжих, тахикарди зэрэг шинж тэмдгүүд илэрнэ. Түүний эсрэг антидот байхгүй. Шинж тэмдгийн эмчилгээ хийнэ. Хэдийгээр цусны сийвэнгийн уурагтай холбогддог боловч, гемодиализ үр дүнгүй.

Хадгалалт: