Нүд хуурайших эмгэг нь нулимс нүдийг хангалттай хэмжээнд тослох боломжгүй, найрлага тогтворгүй, хангалттай нулимс гардаггүй зэргээс үүсдэг нийтлэг илэрдэг эмгэг юм. Нүд хуурайшилт нь янз бүрийн нүд цочроох эмгэгүүдийн үндэс болдог бөгөөд энэ нь даамжирвал архагшиж, эмчилгээгүй болдог.

Шалтгаан:

Нулимс нь усархаг шингэн, өөх тос, салиа гэсэн 3 үндсэн найрлагатай байдаг бөгөөд энэ 3 найрлага нь тэнцвэртэй агуулагдаж байж нүдийг бүрэн чийглэж, тунгалаг чийгтэй байдлаа удаан хадгалах боломжтой болдог тул аль нэг найрлага нь өөрчлөгдөхөд нүдэнд асуудал үүсдэг.

Нүд хуурайших шалтгаан болдог өвчлөлүүд:

• Дааврын өөрчлөлт / Бамбай булчирхайн эмгэг, цэвэршилт /
• Аутоиммуны өвчнүүд
• Ревматойд артрит
• Зовхины булчирхайн үрэвсэл
• Харшил / Чонон хөрвөс, нүдний харшил /
• Паркинсоны өвчин
• А витамины дутагдал
• Хацар улайх эмгэг / росакиа / г.м

Нүд хуурайшихад нөлөөлдөг эмийн төрлүүд:

• Шээс хөөх эмүүд
• Харшлын эсрэг эмүүд
• Сэтгэл гутралын эсрэг эмүүд
• Дааврын эмүүд / жирэмслэлтээс хамгаалах эм, батганы эсрэг эм, даавар орлуулах эмчилгээ/
• Зүрхний хэм алдагдлын үед хэрэглэдэг эмүүд

Шинж тэмдэг:

Агааржуулагчтай өрөөнд удаан байх, салхи сөрж дугуй унах, утас компьютерын дэлгэц удаан ширтэх зэрэгт нүд аргаж, хорсож, улайх шинж илэрдэг. Дийлэнх тохиолдолд хоёр нүдэнд 2-ууланд нь илрэх бөгөөд дараах шинжүүд илэрнэ.

• Нүд хорсох, загатнах
• Нүдний эргэн тойронд зунгааралдсан нуух ихэснэ.
• Гэрэлд мэдрэмтгий болох
• Нүд улайх
• Нүдэнд ямар нэг зүйл орсон мэт торох
• Контакт линз зүүхэд хүндрэлтэй болох
• Шөнийн цагаар жолоо барихад хүндрэлтэй байх
• Нүд бүрэлзэх, ядрах
• Нүд хуурайшиж улайснаас үүдэн нулимс гарах

Нүд хуурайшихад эрсдэлт хүчин зүйлс:

• 50-аас дээш настай байх
• Эмэгтэйчүүд
• Хоолны дэглэм – А аминдэм багатай, омега-3 багатай хоол хүнс хэрэглэх
• Контакт линз зүүдэг, хараа тэглэх лазер мэс засал хийлгэсэн

Нүд хуурайшихаас урьдчилан сэргийлэх:

• Зовхи нүдийг байнга цэвэр байлгах, бохир гараар хүрэхгүй, нухахгүй байх
• Утас, компьютер үзэхдээ ойр ойрхон завсарлага авах
• Компьютерын дэлгэц нүдний харалдаа байхаар тохируулах
• Хуурай агаарт удаан суухгүй байх, орчноо чийгшүүлэх
• Контакт линз зүүдэг бол нүдээ амрааж зарим үед шилээ зүүж байх

Эмчилгээ:

Нүд аргаж хуурайшиж байгаа үед чийгийг нөхөх нүдний дусаалгуудыг хэрэглэх шаардлагатай. А,Е аминдэмтэй дусаалгууд болон нулимс орлох нүдний дусаалгуудыг нүд ачаалал ихтэй үед хэрэглэж байхыг зөвлөж байна. Энэ нь таны нүдийг цочроож эмзэгшүүлэхээс сэргийлж өгдөг. Мөн гэрийн нөхцөлд халуун усанд норгосон алчуураар нүдний зовхийг 5 мин жин тавин дарж арчиж цэвэрлэнэ. Бүр архагшсан нулимсны дутагдалтай хүмүүст нулимсны сувгийг холбох жижиг ажилбар хийдэг байна.