Өтгөн хаталт гэж юу вэ?

Өтгөн хаталт гэдэг нь гурваас дээш сарын хугацаанд үргэлжилсэн, хүндрэхэд бэрхшээлтэй, хатуу хоргол гаргадаг, баасны дараа гэдэс хоосроогүй мэт санагдах байдлыг хэлдэг байна.

Судалгаанаас үзэхэд ЭХЭМҮТ-д энэ шалтгаанаар хандсан хүүхдүүдийн 55% нь 0-1, 18% нь 2-3, 19% нь 4-9 насныхан байжээ. Тэгэхээр 0-5 насныханд энэхүү эмгэг илүүтэй тохиолдож эмнэлэгт ханддаг байна.

Ямар шалтгааны улмаас өтгөн хатдаг вэ?

Өтгөн хаталт нь хоёр шалтгаантай. Судалгаагаар энэ эмгэг тохиолдож буй хүүхдүүдийн

• 21% - Хоолны буруу хэрэглээнээс
• 79%- Тахир гэдэсний эмгэгийн улмаас өтгөн хатдаг нь тогтоогдсон байна.

Харин хоол тэжээлийн зохисгүй байдал гэдэг нь дараах хэд хэдэн шалтгаантай.

• Нярай хүүхдэд эхийн сүү өгөхгүй хүнсний нэмэлтээр угжих
• Бага насны хүүхдийн хувьд шингэн бага өгөх
• Насны онцлогт таарсан хоолоор хооллохгүй байх
• Ислэг багатай бүтээгдэхүүн буюу гурилан бүтээгдэхүүн ихээр хэрэглэх
• Хөдөлгөөн бага байлгах зэрэг олон хүчин зүйл нөлөөлдөг байна.

Хэзээ эмнэлэгт хандах вэ?

• 7 хоногт 2-оос цөөн удаа хүндрэх
• Баах үедээ нийт хугацааны 25 хувиас дээш хугацааг дүлэхэд зарцуулах буюу хүчтэй дүлэлтээр баас гадагшлах
• Өтгөн нь хоргол хэлбэртэй хатуу, хуурай байх
• Өтгөний хэмжээ багасах
• Шаналгаатай дүлэх шинж тэмдэг ажиглагдвал эмчид хандах хэрэгтэй.

Хэрхэн урьдчилан сэргийлэх вэ?

1-5 насны хүүхэд өдөрт 1,5-2 литр шингэн уух ёстой. Ус, цай, жимсний шүүс зэрэг хүүхдийн амны цангаа тайлах, амин дэмтэй ундаа өгөх хэрэгтэй.

Түүнчлэн өтгөн нь хатах шинж илэрвэл чавганы шүүсийг усаар шингэлж өгж болно.

Түүнчлэн эслэгээр баялаг бүтээгдэхүүн тогтмол хэрэглэх хэрэглэнэ.

Эслэг ихтэй хүнсэнд

• Бүх төрлийн хүнсний ногоо, цэцэгт байцаа, брокколи, лууван,
• Жимс, жимсгэнэ, алим, лийр, жүрж, хар чавга
• Шош, вандуй, овьёос, эрдэнэ шиш, хивэг,
• Хөх тарианы гурил, талх, арвайн гурил багтдаг.

Харин бага насны хүүхдүүдэд томчуудын хоолноос өгөлгүй эрүүл мэндийн ягаан дэвтэрт бичсэн хоолны жороор хооллох хэрэгтэй.

Нэмэлт сүү хэрэглэдэг нярайн баас хатсан тохиолдолд хүүхдийнхээ сүүг солих шаардлагатайг эмч зөвлөж байна.

Дараах хүнсний бүтээгдэхүүн нь өтгөн хатахад ихээхэн нөлөөлдөг тул хүүхдэдээ өгөхөөс зайлсхийгээрэй.

• Цагаан будаа, нарийн гоймон,
• Дээд гурилаар хийсэн бүтээгдэхүүнүүд,
• Дээд буюу нарийн гурилан талх,
• Кисель,
• Шоколад,
• Халуун цай, кофе,
• Мойл,
• Какао,
• Ээдэм, бяслаг, ээзгий, халуун сүү зэрэг юм.

Клизм тавих нь зөв үү, буруу юу?

Эмчийн зөвлөгөөгүйгээр эцэг эхчүүд нярай болон бага насны хүүхдүүддээ гэрийн нөхцөлд клизм тавих нь бий.

Таваас дээш хоног л бие засаж чадахгүй бол заавал эмчид хандаж зөвлөгөө авах хэрэгтэй. Үүний үндсэнд хүүхдэд тосон клизм тавих юм.

Тосон клизм хэрхэн тавих вэ?

Хүүхдэд дур мэдэж тосон клизм тавьж болохгүйг анхаарах хэрэгтэй.

• Эцэг эх заавал гараа угаана.
• Хүүхдийн тосон клизмын хайрцаг дээр кг жинд тохируулсан зааврын дагуу хэмжээг тохируулна.
• Хүүхдийг хөлийг нугалж гэдэс рүү болгоод хажуу тал эсвэл доошоо харуулж клизмийн хошууг заасан тэмдэг хүртэл хийж зөөлөн шахна.
• Хүүхдийн бөгсийг барьж 5мин хэртэй байлгана.
• Хүүхдийг коршонк дээр суулгаж өтгөнийг гадагшлуулна.