Тонер/ скин бүүстэр/ тоникийг гурван янзаар хаяглагддаг боловч тоник бүхэн нэг үйлчилгээтэй. Нүүр цэвэрлэгч хөөс нүүрний будаг, бохирдлын 80 хувийг авдаг бол, дараа нь тоникоор арчсанаар үлдсэн 20 хувийн гүн бохирдлыг цэвэрлэдэг бөгөөд арьсыг зөөлөн чийглэг болгон нүхийг агшаадаг.

 

Тоникийг бүх төрлийн арьстай хүн хэрэглэж болно. Тэр дундаа тослог, холимог арьстай бүсгүйчүүд заавал хэрэглэх шаардлагатай. Батга гардаг, асуудалтай арьсанд салицилийн хүчил болон спиртийн найрлагатай, хатааж, тослог тэнцвэржүүлдэг тоник тохирно. Харин хуурай, эмзэг арьстай хүмүүст сарнай, өргөст хэмх, лаванда зэрэг органик найрлагатай, чийгшүүлэгчтэй тоник хэрэглээрэй.

 

Тоник нь хөвөнд шингээж арчдаг, шууд нүүр лүү цацдаг (mist), түрхэж шингээдэг гэсэн хэлбэр төрлүүдтэй байдаг. Алийг нь ч түрхсэн, хэрэглэснийхээ дараа серум, тос, маск түрхэхээсээ өмнө нэгээс хоёр минут байлгаж шингээгээрэй.

 

Тоникийг тонер гэхчилэн улс орнууд өөр өөр нэрлэж хэрэглэдэг ба Японы гоо сайхны бүтээгдэхүүн үйлдвэрлэгчид тоникоо lotion буюу лосьон гэж нэрлэдэг. Харин Солонгосын “Toner” гэсэн бичигтэй бүтээгдэхүүнүүд арчих цэвэрлэхээс илүүтэй түрхэж, чийгшүүлэх үйлчилгээтэй байдаг. Учир нь Солонгосчууд ихэвчлэн тосон, хөөсөн гэсэн хоёр дамжлагатайгаар нүүрээ сайн цэвэрлэж заншсан байдаг.

 

Тоникийн үйлчилгээ ба давуу талууд:

-Нүх агшаана

Гэрийн нөхцөлд жижиг хөвөнд бага зэрэг шингээгээд нүхжилттэй хэсэгтээ зөөлөн товшиж арчина. Энэ нь тослогийг багасгах үзүүлдэг.

 

Арьсны РН балансыг / хүчил шүлтийн тэнцвэр / тэнцвэртэй байлгана. Бидний арьс төрөлхийн хүчиллэг байдаг ба 5, 6 нас хүртэл л РН баланс тэнцвэртэй байдаг. Бидний хэрэглэдэг савангууд ихэнхдээ шүлтлэг байдгаас энэ тэнцвэрийг маш ихээр алдагдуулж байдаг. Харин тоник хэрэглэснээр энэ тэнцвэрийг маш сайн хадгалдаг ажээ.

 

Хамгаалалтын давхрага болдог

 

Бид нүүрнийхээ будгийг арилгаж цэвэрлэснийхээ дараа эсвэл будахынхаа өмнө цэвэр арьсан дээр тоникоо хэрэглэдэг. Тоник нь арьсан дээр нэмэлт хамгаалалт болж чийгийн давхарга үүсгэдэг.