Зуны улиралд нарны хурц туяанд удаан хугацаагаар байсны дараа арьс улайх, загатнах, жижиг тууралт гарах зэрэг шинж тэмдэг илэрдэг. Үүнийг хүмүүс “нарны харшил” гэж нэрлэдэг. Гэвч энэ нь дан ганц нарны гэрэлд харшилтай гэсэн үг биш бөгөөд хэт ягаан (UV) туяанд арьс хэт мэдрэг хариу урвал үзүүлж байгааг илэрхийлдэг.

Нарны харшлын шинж тэмдэг

* Арьс улайх

* Загатнах, хорсох мэдрэмж төрөх

* Жижиг улаан тууралт, цэврүү үүсэх

* Хавагнах

* Ихэвчлэн нар ил гардаг хэсгүүд болох нүүр, хүзүү, гар, мөр, цээжинд илэрдэг

Шинж тэмдэг нь нарны туяанд гарснаас хойш хэдэн минутын дараа эсвэл хэдэн цагийн дараа илэрч болно.

Хэн илүү өртөмтгий вэ?

* Цайвар арьстай хүмүүс

* Эмэгтэйчүүд

* Нарны гэрэлд удаан хугацаагаар гэнэт өртсөн хүмүүс

* Зарим эм (антибиотик, шээс хөөх эм, үрэвслийн эсрэг зарим эм)-ийг хэрэглэж байгаа хүмүүс

* Арьсны болон дархлааны зарим өвчтэй хүмүүс

Урьдчилан сэргийлэх арга

* Өдрийн 11:00–16:00 цагийн хооронд шууд нарны тусгалаас аль болох зайлсхийх.

* SPF 30 ба түүнээс дээш хамгаалалттай өргөн хүрээний (UVA/UVB) нарны тосыг гадагш гарахаас 15–30 минутын өмнө түрхэж, 2 цаг тутамд болон усанд орсны дараа дахин түрхэнэ.

* Малгай, урт ханцуйтай нимгэн хувцас, нарны шил хэрэглэнэ.

* Арьсаа чийгшүүлж, хангалттай ус ууна.

 

Харшил илэрвэл яах вэ?

* Шууд сүүдэртэй газар орж, нарнаас холдох.

* Арьсаа сэрүүн жин тавьж тайвшруулах.

* Үнэргүй чийгшүүлэгч тос хэрэглэх.

* Загатнах нь хүчтэй бол эмчийн зөвлөсний дагуу антигистамин эм эсвэл үрэвслийн эсрэг тос хэрэглэж болно.

* Тууралт өргөн тархах, цэврүү томрох, халуурах, нүүр болон амьсгалын зам хавагнах зэрэг шинж илэрвэл яаралтай эмнэлэгт хандах шаардлагатай.

Анхаарах зүйл

Нарны харшлыг энгийн наранд түлэгдэлттэй андуурч болохгүй. Хэрэв жил бүр давтагддаг, эсвэл шинж тэмдэг хүчтэй илэрдэг бол арьсны эмчид үзүүлж, шаардлагатай тохиолдолд нэмэлт шинжилгээ хийлгэх нь зүйтэй.

Эрүүл арьс – зөв хамгаалалтаас эхэлдэг. Нарны туяанаас өөрийгөө зөв хамгаалж, арьсандаа тохирсон арчилгаа хийснээр нарны харшлын эрсдэлийг бууруулах боломжтой.