Та хэрвээ гэрийн тэжээмэл амьтан, тоос шороо, хөгц, ургамлын тоосны харшилтай бол гэртээ зовуурьгүй байхад тань тусалъя.

Хэрвээ та улирлын шалтгаант харшлын ринит юмуу харшлын гаралтай гуурсан хоолойн багтраатай бол гэр дэхь харшил төрөгчүүдийг бууруулах дараах аргуудыг хэрэглээрэй. Өрөөний зохион байгуулалтын саналыг толилуулж байна.

Унтлагын өрөө

Ор ба цагаан хэрэглэл. Дэр, матрас, пүрштэй зузаан гудсыг тоосны хачиг наалддаггүй гэрээр бүрэх. Бүтээлэг, дэрний уут, хөнжил зэргийг долоо хоногт багадаа нэг удаа, 54 C-с халуун усанд угаах хэрэгтэй. Хөвөнтэй хөнжлийг авах, угаах эсвэл бүтээх хэрэгтэй. Ноос юмуу сөдөн цагаан хэрэглэлийг нийлэг материалаар солих.

Шал. Хивсийг авч, хатуу модон эсвэл шалны хулдаас ашиглах мөн угаагддаг хивсэнцэр ашиглах. Хэрвээ ингэх боломжгүй бол, богино-үстэй хивс дэвсэж, долоо хоногт нэг удаа нарийн тоосонцрын шүүлтүүр (HEPA) бүхий тоос сорогчоор соруулах. Хивсийг ойр ойрхон угаах.

Хөшиг, тюль. Угаагддаг, цулгуй даавуун материалтай эсвэл нийлэг материалтай хөшиг ашиглах. Хөндлөнгөөр эвхэгддэг хуванцар тюлийг хуйлагддаг угаагддаг тюлиэр солих.

Цонхнууд. Цонхыг хааж, ургамлын тоосонцрын улиралд агаарын кондишнер ашиглах. Хөгц, цонхны хүрээ, цонхны тавцангийн чийгийг цэвэрлэх. Хэрвээ хүйтэн цаг ууртай газар амьдардаг бол давхар шилтэй цонх ашиглах.

Тавилгууд. Цэвэрлэхэд хялбар сандал, шүүгээ болон арьсан, модон, метал эсвэл хуванцар тавилгуудыг унталганы өрөөнд сонгох. Хэрвээ боломжтой бол, бүрээстэй тавилга ашиглахгүй байх.

Эмх цэгцтэй байдал. Тоос шороо цуглуулдаг зүйлс буюу жижиг чимэглэл, ширээн дээрх гоёл чимэг, ном, сэтгүүлийг байлгахгүй байх. Хүүхдийн тоглоом, чихмэлийг хуванцар хайрцганд хадгалах.

Гэрийн тэжээмэл амьтан. Хэрвээ та өөрийн муур, нохой болон бусад үсэрхэг гэрийн тэжээмэл амьтандаа шинэ гэр олж чадахгүй бол ядаж амьтдаа унтлагын өрөөнд оруулахгүй байх. Гэрийн тэжээвэр амьтдыг долоо хоногт ядаж нэг удаа усанд оруулах нь тэднээс унах хагны хэмжээг бууруулах болно. Амьтдыг долоохоос нь зайлсхийх.

Агаарын шүүлтүүр. Нарийн ширхэг тоосонцор шүүгч эсвэл HEPA шүүлтүүр сонгох. Агаар шүүгчийг унтах үед толгойруу чиглүүлэн цэвэр агаарыг тохируулаарай.

 

Зочны өрөө

Шал. Хивсийг авж, хатуу модон шал эсвэл шалны хулдаас болон угаагддаг хивсэнцэр ашиглах. Хэрвээ боломжгүй бол, богино үстэй хивс дэвсэж, нарийн тоосонцрын шүүгчтэй эсвэл HEPA шүүлтүүртэй тоос сорогчоор долоо хоногт нэг удаа соруулах хэрэгтэй. Угаагддаг хивсэнцэр, шалны дэвсгэрийг долоо хоног бүр угаан, хананы хивсийг давтамжтайгаар шампуниар угаах.

Тавилгууд.  Бүрээстэй буйдан, сандлыг арьсан, модон, метал, эсвэл хуванцар тавилгаар солих талаар бодолцох.

Хөшиг, тюль. Угаагддаг, цулгуй даавуун эсвэл нийлэг материалтай хөшиг ашиглах. Хөндлөн, эвхэгддэг хуванцар тюлийг угаагддаг, хуйлагддаг тюлиэр солих.

Цонхнууд. Ургамлын тоосонцрын улиралд цонхыг хааж, агаарын кондейшн ашиглах. Хөгц, цонхны хүрээ, цонхны тавиур дээрх чийгийг цэвэрлэх. Хүйтэн цаг агаартай газар амьдардаг хүмүүс давхар цонх ашиглах.

Ургамлууд. Тасалгааны цэцгийг гэрээс гаргах эсвэл хөгц үрждэг шороон дээр нь  аквариумын хайрга цацах.

 

Гал тогоо

Плитка. Хавхлагат сорогч сэнс суулган, ашиглаж, хоолны үнэр, чийгийг бууруулах. Ихэнх газан плиткан дээрх бүрхүүл нь хоол хийх үеийн тоосонцрыг гадагш сорохгүйгээр шүүдэг.

Тосгуур. Аяга, тавгийг өдөр бүр угаах. Тосгуур, усны цоргыг үрж угаан, хөгц, хоолны үлдэгдлийг арилгах.

Хөргөгч. Илүүдэл чийгийг арчин, хөгц үржихээс сэргийлэх. Хөгцөрсөн эсвэл хугацаа нь дууссан хүнсийг хаях. Хөргөгчний арын дуслын тогооны усыг тогтмол асгаж, цэвэрлэж байх, хөргөгчний хаалганы хөгцөрсөн жийргэвчийг цэвэрлэх эсвэл солих.

Шүүгээ, ширээ. Шүүгээ болон ширээний тавцанг угаалгын нунтаг, усаар цэвэрлэх. Тосгууртай шүүгээний ус дамжуулах хоолойноос ус алдаж буй эсэхийг шалгаж байх. Хүнсийг – гэрийн тэжээвэр амьтныхыг ч бас битүүмжлэлтэй агуулахад хадгалах.

Хоолны үлдэгдэл. Хогны уутыг шавж орохгүй тагтай хогийн саванд хийж, өдөр бүр хогийг хаяж байх. Гал тогоог хоолны үртэс, үйрмэггүй байлгах нь оготно, жоом амьдрахыг бууруулдаг.

 

Ариун цэврийн өрөө

Агааржуулалт. Агаар гадагшлуулагч сэнсийг байрлуулж ажиллуулан, ваннд орох юмуу шүршүүрт орох үеийн чийгийг бууруулах.

Шал. Хивсийг авж, хавтан, хулдаасан, модон шал хийх. Угаагддаг дэвсгэр ашиглах.

Хана. Ханын зураг байдаг бол гарган хавтан байрлуулах эсвэл ханыг хөгц үрждэггүй лакан будгаар будах.

Шүршүүр ба ванн. Тосгуур, ванныг хуурай байлгах, ашигласны дараа хөшиг, хаалгыг хааж байх. Ванн, шүршүүр, гоожуурыг хөгцөөс салгахаар үрж угаах, цайруулагч бодис ашиглах. Шүршүүрийн хөшиг болон ванны хөгцөрсөн дэвсгэрийг цэвэрлэх эсвэл шинээр солих.

Суултуур ба угаалтуур. Ус дамжуулах хоолойн бэхэлгээний хөгцийг үрж цэвэрлэх. Ус гоожиж байвал засах.

 

Зоорь

Шал. Хөгцөрсөн эсвэл язарсан хивсийг хаях. Хэрвээ боломжтой бол, Бетон юмуу хулдаасан шал хийх.

Тавилга. Бүрээстэй буйдан болон сандлыг арьсан, модон, метал, хуванцар материалтай тавилгаар солих.

Суурь, цонхнууд ба шатны хонгил. Ус гоожилт болон язрал зэврэлийг засах.

Агаарын чанар. Чийг гадагшлуулагч ашиглаж чийгийг бууруулан, долоо хоногт нэг удаа цэвэрлэж байх.

Хадгалалт. Хадгалах зүйлс, хувцсыг хуванцар саванд хийж хадгалах.

Хувцас хатаагч. Чийгийг гэрийн гадаа гаргах.

 

Ерөнхий дүгнэлт

Температур ба чийгшил. Халуун, чийглэг байшинд тоосны хачиг болон хөгц үржих таатай орчин болдог. Температурыг 20 C- 22C хооронд, харьцангуй чийгшлийг 50%-иас ихгүй байлгана. Төвийн халаагч болон сэрүүцүүлэгч системийн болон өрөөний агаарын кондейшний нарийн-тоосонцрын шүүлтүүрийг сард багадаа нэг удаа цэвэрлэх эсвэл солих.

Хортон шавжууд. Багажны дэлгүүрээс жоом, оготны хямд хавх авч тоог нь хянах. Хэрвээ үр дүнгүй байвал мэргэжлийн шавж устгагчийг хөлсөх хэрэгтэй. Харшил-сэдрээгч шавж болон оготноны үлдэгдлийг тоос сорогчоор соруулах, хатуу гадаргууг угаах байдлаар зайлуулна. Дахин үржихээс сэргийлэхийн тулд байшингийн онгорхой нүх, сүв, өөр бусад орох боломжтой газрыг бөглөх хэрэгтэй.

Хөгц. Дулаан цаг агаартай үед хаалга, цонхыг хаан, агаарын кондейшн болон чийг гадагшлуулагч ашиглана. Угааж болдоггүй, хөгцөрсөн хивс гэх мэт материалыг хаях. Угаагддаг материалыг 5%-ийн хлорын шохойны уусмалаар угаадаг ба хөгцийг цэвэрлэж байхдаа амны хаалт хэрэглэх хэрэгтэй байдаг. Шал, таазнаас ус гоожиж буй эсэхийг шалгана.

Долоо хоногийн цэвэрлэгээний хуваарь. Модон болон хулдаасан шаланд чийгтэй цэвэрлэгээ хийн, хивсийг тоос сорогчоор цэвэрлэнэ. Нарийн тоосонцрын шүүгчтэй эсвэл HEPA шүүлтүүртэй тоос сорогчийг ашиглана. Хаалганы дээд тал, цонхны тавцан, цонхны хүрээнд чийгтэй цэвэрлэгээ хийнэ. Хэрвээ та харшилтай бол тоосны хамгаалалттай амны хаалт зүүх эсвэл өөр харшилгүй хүн олж цэвэрлүүлнэ.

Тамхидалт. Гэр дотор хаана ч тамхи татахыг бүү зөвшөөр.