Хэрэглэх заалт
- Беллергамин нь нийлмэл найрлагатай эмийн бэлдмэл юм. Түүний идэвхтэй бодисын найрлаганд Гуахатаны алкалоид, эрготамин болон фенобарбитал агуулагддаг. Гуахатан ургамлын алкалоид нь ходоод, гэдэс, цөс болон шээс ялгаруулах замын гилгэр булчингийн агчилыг арилгадаг. Олон эрхтэний шүүрлийг багасгадаг тул ходоодны шүүрэл ихэссэнтэй холбоо бүхий эмгэг байдлыг арилгахад туслана.
- Эрготамин нь цусны судас түүний дотор тархины судсыг нарийсгадаг тул толгойн судасны гаралтай өвдөлт ялангуяа мигрень өвчний эмчилгээнд хэрэглэгддэг.
- Фенобарбитал нь тархи мэдрэлийн идэвхийг дарангуйлан тайвшруулдаг.
- Беллергамин нь толгойн судасны гаралтай өвдөлт (мигрень), цэвэршилтийн хам шинжийн (халуун оргих, тайван бус болох, хөлрөмтгий болох, нойргүйдэх) эмчилгээ болон зүрх судасны систем, ходоод гэдэсний ба шээс бэлгийн замын талаас илэрсэн үйл ажиллагааны өөрчлөлтийн үед вегетатив мэдрэлийн талаас илрэх шинж тэмдгийн (тайван бус болох, түгшүүрлэх, зүрх дэлсэх, толгой өвдөх, нойр өөрчлөгдөх, агчил үүсэх гэх мэт) эмчилгээнд хэрэглэгддэг.
Найрлага
- Нэг бүрхүүлтэй шахмалд алкалоидтой тэнцэхүйц,атропинд шилжүүлсэн тунгаар тооцсон Гуахатаны үндэсний шингэн ханд 0.1 мг,эрготамины тартрат 0,3 мг,фенобарбитал 20 мг агуулагдана.
Гаж нөлөө
- Бусад бүх эмийн нэгэн адилаар Беллергамин ч бас гаж нөлөө үүсгэж болох ба харин тэр нь хүн бүрд илрэхгүй.
- Харьцангуй олонтоо тохиолддог (>1/100) гаж нөлөөний тоонд толгой эргэх, нойрмоглох, ам хатах, өтгөн хатах, хөлс ялгаралт багасах, хэсгийн хаван болон ядрамтгай болох зэрэг гаж нөлөө ордог.
- Цөөвтөр тохиолдолд (<1/100) эмчилгээний үед илэрч болох гаж нөлөөний тоонд ходоод гэдэс хямрах (дотор муухайрах, бөөлжих, гэдсээр хатгаж өвдөх), залгих үйл ажиллагаа алдагдах (дисфаги), хоолой үрэвсэх, суулгах, гэдэс дүүрэх(метеоризм), тайван бус болох, ухаан санаа будангуйрах, толгой эргэх, толгой өвдөх, нойрмоглох, зүрхний хэм хурдсах, зүрхний хэм цөөрөх (брадикарди), цээжээр өвдөх, цусны даралт ихсэх, хараа өөрчлөгдөх, нүдний дотоод даралт ихсэх (глауком хүндрэх), амьсгал бачуурах, дүлүүлж шээх, ялангуяа явах үед үе мөч өвдөх агчих, шоргоолж гүйж байгаа юм шиг мэдрэмж төрөх, тархины цусан хангамж буурах, арьсаар тууралт гарах, Стивенс-Жонсоны хам шинж илрэх (арьс, нүд, бэлэг эрхтэнд цэврүү үүсэх хэлбэрээр илэрдэг эмгэг), цусны дүрст элементүүд өөрчлөгдөх (агранулоцитоз, тромбоцитопени), таталт үүсэх, халуурах болон элэг гэмтэх зэрэг гаж нөлөө ордог.
- Эрготаминд хэт мэдрэгшсэн өвчтөнд хэт мэдрэгшлийн урвал (судаслаг хаван), хэсгийн хаван болон загатнаа үүсч болзошгүй.
- Фенобарбитал хэрэглэж байсан өвчтөнд хэт мэдрэгшлийн хүнд хэлбэрийн урвал (DRESS-хам шинж). DRESS-хам шинжийн үед тууралт илрэх, халуурах, эозинофили болон системийн хам шинжүүд тухайлбал аденопати (тунгалагийн булчирхай томрох), гепатит, бөөрний үйл ажиллагаа өөрчлөгдөх, уушгины эмгэгшлүүд үүсч болзошгүй.
- Хэрэв тууралт илэрвэл бэлдмэлийг хэрэглэхээ зогсоох ба харин эмчид хандтал шинэ эмчилгээ хийж болохгүй.
- Ясны өөрчлөлт, түүний дотор остеопени, остеопороз(яс нимгэрэх г.м.) ба хугарал тохиолдож байсан тухай мэдээлэл бий.
- Энэхүү бэлдмэлээр эпилепсийн эсрэг эмчилгээг удаан хугацаагаар явуулж байгаа болон остеопорозын өгүүлэмжтэй ба стероидууд хэрэглэж байгаа бол энэ тухайгаа эмчтэйгээ зөвлөлдөөрэй.
- Хэрэв танд ямар нэгэн гаж нөлөө ноцтойгоор илрэх буюу зааврын хуудсанд дурьдагдаагүй ч гэсэн бусад гаж нөлөө илэрвэл өөрийн эмч буюу эм зүйчдээ мэдэгдэн зөвлөгөө аваарай.
Хэрэглэх арга
Ердийн тун нь:
Насанд хүрэгсэдэд:
- Өдөрт 1 шахмалаар 3-4 удаа ууж хэрэглэнэ. Тухайн байдалд тохируулан эмч хоногийн тунг 6 шахмал хүртэл нэмэгдүүлж болно.
Хүүхэд болон 18 нас хүртэлх өсвөр үеийнхэнд:
- Хүүхэд болон 18 нас хүртэлх өсвөр үеийнхэнд Беллергаминыг хэрэглэдэггүй болно.
Хэрэв та Беллергамин шахмалыг шаардагдах хэмжээнээс нь хэтрүүлэн хэрэглэсэн бол
- Хэрэв та зохих хэмжээнээс нь тунг хэтрүүлэн хэрэглэсэн бол дараах шинж тэмдэгүүд илэрч болох юм. Үүнд: арьс хуурайшин улайх, ам хатах, дотор муухайрах, бөөлжих, хүүхэн хараа өргөсөх, хараа өөрчлөгдөх, зүрхний цохилт хурдсах, үе мөч агчих, дүлүүлж шээх, цочромтгой болох, харааны болон сонсголын хий үзэгдэл илрэх, таталт үүсэх зэрэг болно.
- Хэрэв дээрх шинж тэмдэгүүд илэрвэл эмчлэгч эмч буюу эмнэлгийн байгууллагад яаралтай хандах хэрэгтэй.
